SO IKALIMA A KALIMA

بِسْمِ اللّٰهِ الرَّحْمٰنِ الرَّحِيمِ

اِنَّ اللّهَ مَعَ الَّذِينَ اتَّقَوْا وَالَّذِينَ هُمْ مُحْسِنُونَ1

 

O khabayaan ka mailay so tanto a kaiportanti a atastanggongan o manosiya so kinggolalann ko salâh go so di kaphnggalbk ko manga ala a dosa, nago mataan a kapapatotan ko fitrah ago antap o kiyaadna ko manosiya, na ilay angka giyaya a mababa a thotolan a sii ko ropaan a kapagabay nagongka pamakin’ga:

Sii ko oras a kapriparado o manga sondaro, na adn a dowa a sondaro a magpda ko bataliyon, so isa na barasa go phkababayaan iyan so atastanggongan iyan, na so salakaw a kna ba barasa na aya niyan bo matatagikor na so nafs iyan. Na so sondaro a phkababayaan iyan so atastanggongan iyan, na iipatn iyan so kambarasa go so jihâd nago kna ba niyan aawidan a akal so riski ago bagian iyan. Ka sasabotn iyan a so kaphakakan go so kaphmbgi rkanyan sa manga kasangkapan, so kaphmbolongi rkaniyan igira a miyasakit nago apiya pn so kapsongita ron a pangn’ngkn o kinanglan, na manga atastanggongan anan o phangampong.  Nago aya niyan tanto a iportanti a atastanggongan na kambarasa go kanjihad. Ogaid na gii niyan di minggolalan so sabaad a sirbisiyo para ko riski go manga galbk mipantag ko kasangkapan. Pamakadidian iyan so kandiron, pangonaban iyan so manga rrsik a lapad nago phangawidan iyan. Igira a phkaizaan skaniyan: “Antonaa i phsowaan ka?”, na aya niyan gii matharo na: "Gii akn golalan giyaya a atastanggongan a inisnggay rakn o phangampong." Kna ba niyan gii tharoa a: "Gii ako nggalbk para ko kaoyagan akn."

So salakaw a kna ba barasa a sondaro, a skaniyan na dalo, na kna ba niyan tatagoa sa ginawa so kambarasa go so kathidawa.  "Sangan anan o phangampong. Da dn a ba akn san labot!"  aya niyan gii matharo. Na lalayon niyan pipikirn so kaoyagan iyan, tatalokonan iyan, na tiyalikodan iyan pn so bataliyon nago ba dn somiyong sa padian go miyamamasaan. Miyakaisa a alongan na so ginawai niyan a barasa na pitharo iyan rkaniyan a:

"Pagariya, so pompongan a atastanggongan ka na kambarasa go kapakithidawa. Inowit ka saya para sangkoto. Sarigi ngka so sultân. Knaba ka niyan pn khowaa a ongos. Ka giyanan i atastanggongan iyan. Nago ska na di phkagaga go miskin; dingka maphakakan a ginawangka bapiya anda. Nago, oras ini a jihâd ago kapriparado o manga sondaro. Nago, phamthowangka iran sa ribil go ka iran ndan’gn. Oway, sa talikodan tano na dowa a atastanggongan a phkailay. Isa na so atastanggongan o sultân a so kaphakakana rkatano; na igira kowan na gii tano inggolalan so inisnggay a sangan tano sa giyoto a atastanggongan. So ika dowa na atastanggongan tano a so kambarasa go kathidawa; so sultân na phagogopan tano niyan sa kapakalboda niyanon"

Sabotn ka dn a mataan a mala a kabinasaan ko boklo a sondaro so di niyan kaphamakin’ga ko giyoto a mujâhid a barasa.

Kagiya maoto, Hay nafs akn a boklo! Giyoto a phkasalinsalin a btad o kathidawa na giya so onosonos a kaoyagoyag sa doniya. So pman so armi a pimbaa-baad ko manga bataliyon, na so opakat o manosiya. Na so bataliyon na giyoto so jamaah o Islam sa masa imanto. Na so pman so dowa kataw a sondaro, so isa na Muslim a adn a takwâ niyan (muttakî) go katawan iyan so fardh o agama niyan nago gii niyan siran minggolalan ago gii niyan di minggolalan so  jihad ko nafs go ko shaytan kaan iyan katalikodi so kabâir ago kaan di niyan manggalbk so manga dosa. So salakaw pman na fâsik a madadadag, tiyalikodan iyan so fardh nago minggalbk sa sadn sa dosa a phkasaot iyan sii ko lalan a kakhaoyagan go gii niyanon di ipangos’ng so kapanagontaman ko kakhaoyagan taman sa gii niyan di panditan so Bnar a Razzâk. So pman so kambarasa ago sogoan, (pagampaganay na so salâh) na skaniyan so ‘ibâdah. Na so pman so kathidawa, na skaniyan so kasabta ko poso ago rûh phoon ko manga dosa, manga rarata a parangay ago kabinasaan a  tatap a daa kaposan iyan  golalan sa jihad ko nafs go manga baya iyan nago ko manga shaytan sii ko jinn ago manosiya. Na so pman so giyoto a dowa a atastanggongan, so isa ron na so kabgay sa kaoyagoyag ago so ka pagpraon. So salakaw ron na so kinggolalann ko ‘ibâdah ago so kapamangni ko Skaniyan a phmbgay sa kaoyagoyag ago phagpron; na giyanan so ka-thawakkul sii Rkaniyan go so kapanarig sii Rkaniyan.

Oway, sadn sa migay go mimbaal ko niyawa - a aya daa lawan iyan a malomantas a piyakammsa a parahiyasan o As-Samad ago aya piyakammsa ko hikmah o Ar-Rabb, na Skaniyan so phagpr ago plinding ko kaoyagoyag golalan ko rizki. Da dn inonta bo ka Skaniyan. Khabaya ka sa poriba? So daa lawan iyan a malobay ago mabodaboda a manga pangangayamn na siran i daa lawan a pkaphagpr piyapiya. (Datar o manga sda ago manga lowati sii ko manga onga.) So di phkagaga ago rki-rkign a manga kaadn, siran i phkakan sa daa lawan iyan a manga a pipiya a rizki. (Datar o manga wata ago manga ikaririga.)

Oway, kaan kasaboti a so okit ko halal a rizki na kna ba sii ko bagr ago trang ka sii ko ka di phakagaga ago kalobay, kiyasokodan a iabay so manga sda ko manga lako, so manga ikaririga ko manga binatang nago so manga kayo ko manga pangangayamn.

Ma’ana oto na sadn sa ibagak iyan so salâh niyan para bo ko kapanagontaman ko kakhaoyagan na miyakasaibarat ko sondaro a  tiyalikodan iyan so kambarasa ago so kota iyan na ba dn gii mamalad sa padian. Ogaid, na mapasad iyan minggolalan so salâh, na so kaploba ko bagian iyan phoon ko rahmah o manga tindai o Janâb Ar-Razzâk, a Skaniyan so Karîm, nago so kasongowi niyanon kaan di phmbaloy a tanggad ko salakaw di salakaw na giyaya na kapiyaan ago kawaraw; na giyai mambo na ‘ibâdah.

So fitrah o manosiya ago manga ma’nawî a ibatibat iyan na iphakiilay niyan a skaniyan na inadn para ko ‘ibâdah. Kagiya sii ko ilayan ko tabiat ago bagr, a manga kinanglan ko kaoyagoyag iyan sa doniya, na di niyan bo marpng so miyamakaronironi a papanok, a gyoto so knti.  Na sii pman ko mipantag ko ‘ilm ago kamimiskin, kapangalimbabaan a kapamangni ago ‘ibâdah, a manga kinanglan ko ma’nawî a kaoyagoyag iyan go so kaoyagoyag iyan sa âkhirah,na skaniyan na sultân ago komandar o manga pangangayamn.

Kagiya maoto, Hay nafs akn! Opama ka mbaloyn ka so kaoyagoyag sii sa doniya a aya onayan a singanin ka ago lalayonn ka i kanggalbka on, na phmbaloy ka a sondaro o knti, papanok a miyamakaronironi. Ogaid na opama ka mbaloyn ka so kaoyagoyag sa âkhirah a aya onayan a singanin ka, nago mbaloyn ka giya a kaoyagoyag a titayan iyan go pamomolaan iyan nago kapanagontamanon, na phmbaloy ka a maporo a komandar o manga pangangayamn, pakathatayaan go mangalimbabaan a ‘abd o Janâb-i Hakk, a sslaan ago pagaadatan a banto Iyan sii sa giya a doniya. 

Giyaya so dowa a lalan a para rka! Pamimili ka sadn sa khabayaan ka on...

Pangni ka sa hidâyah ago tawfik phoon ko Arhamurrâhimîn...

* * *