SO IKAWALO A KALIMA

 

بِسْمِ اللّٰهِ الرَّحْمٰنِ الرَّحِيمِ

اَللّٰهُ لاَ اِلهَ اِلاَّ هُوَ الْحَىُّ الْقَيُّومُ ٭ اِنَّ الدِّينَ عِنْدَ اللّٰهِ اْلاِسْلاَمُ1

 

O khabayaan ka a kasabotingka giya a doniya, go so rûh o manosiya sii ko doniya, nago so rasa go kipantag o agama sii ko manosiya, nago o khabayaan ka a kasabotingka a so doniya na malibot’ng a kalabosoan o daa hakk a agama, nago so daa agama niyan a manosiya na skaniyan i lbi a doan niyan ago maboboko a kaadn, nago so  يَا اَللّٰهُ   2 ago لاَ اِلهَ اِلاَّ اللّٰه 3

iphlka ko pagns o giya a ‘âlam nago pagaonn iyan so rûh o manosiya sii ko kalibot’ng, na ilay angka giya a mababa a thotolan a sii ko ropaan a kapagabay, nago pamakin’g ka: 

Isako gowani, na adn a dowa a magari a raks a lomiyalakaw sa mawatan. Magpda siran taman sa so lalan na miyabagi sa dowa. Miya ilay iran a matolang’d a mama sii ko phoonan o dowa a lalan.

Inizaan iran skaniyan, “Anda i lalan a mapiya?”

Pitharo iyan kiran, “Sii ko kawanan a lalan, na kinanglan so kapangongonotan ko kokoman ago atoran.  Ogaid na sii ko giyoto a bagambang, na adn a kapipiya ginawa ago kalilintadon. Na sii pman ko diwang a lalan, na adn a maradika go paar a ginawa. Ogaid na sii ko giyoto a maradika, na adn a pakalklk ago kasabkon. Na imanto na so kapili na miyatimo rkano!”

Mapasad iran mapamakin’g, na so pagari a mapiya i parangay na somiyong sa kawanan nago pitharo iyan a تَوَكَّلْتُ عَلَى اللّٰهِ  4

nago tiyarima iyan so kapangongonotan ko atoran ago ompiya. Na so pman so salakaw a pagari a baradosa ago baonga na pinili iyan so diwang a lalan para bo ko maradika. Sii ko poringana tano na tondogn tano giya a mama sii ko btad iyan a datar a malbod ogaid na pakarasay ko ma’nawî.

 

Kagiya maoto, na giya a mama na lomiyalakaw ko karomasayan go madakl a kasndodan,  nago matogotogo na somiyold ko inawaan a bagas. Pankaw a miyakan’g skaniyan sa pakalk-lk a laginding, nago miyailay niyan a so pakalk-lk a arimaw na lominiyo ko kalasan nago giyobat iyan skaniyan. Miyalagoy skaniyan. Matogotogo, na miyaoma niyan so daa igon a paridi a (60) nm-polo ka mitro i kadalm. Sa kalk iyan na iniitog iyan a ginawa niyan non. Miyaolog skaniyan taman sa miyaoma niyan so lmbak o paridi, a ron miya alaw o manga lima niyan so kayo. Komiyabd skaniyan non. So kayo a mitoh ko panglban o paridi na adn a dowa timan iyan a bkaw. Adn a dowa a riya, isa a mapoti ago isa a maitm a gii ran pangambang’n so giyoto a dowa a bkaw. Lomiyangag skaniyan na miyailay niyan so arimaw a nanayaon niyan skaniyan sii ko kaporoan o paridi, a lagid dn a gordiya. Tomiyolong skaniyan na miyailay niyan a adn a piyakalk-lkon a dragon. A ini bayaw niyan a olo niyan go miyakarani ko parapara niyan a (30) tlo-plo ka mitro sa poro iyan. So ngari iyan na kala o ngari o  paridi. Inilay niyan so panglban o paridi na miyailay niyana adn a phangbot go pakagasta a paold-old sii ko mlilibta on. Lomiyangag ko poro o kayo na miyailay niyan a kayo oto a Tin, ogaid na piyakammsa ka sii ko poro iyan na onga a phitibarangan a kayo, phoon ko walnut taman ko dalima.

 

Kagiya maoto, na sabap ko ribat a kasabot ago ka daa otk iyan, na giya a mama na di niyan sabotn a giyaya na knaba kalilid a btad. Giyaya a manga shay’ na knaba salak a gii manggolaola.  Adn a di kalalayaman a misosoln sii sa giyaya manga btad a knaba kalilid. Nago da niyan sabota a adna malaa gii galbk. Imanto, na apiya dn oto a so poso, rûh ago otk iyan na phnggoraok go mboboko sabap ko giya a malipds  a btad, na likban o nafs al-ammarah niyan so tangila niyan ko kamboboko o poso ago rûh nggolalan sa kapanalindalin a daa katawan iyan a lagid o da siran, na ba dn miyangankanan ko manga onga o kayo nago ba niyan dn phagakala a ginawa niyan a omamanti na sisii skaniyan sa sapadan. Ogaid na kadaklan sa giyoto a manga onga na pakatowa ago phakabinasa. Sii ko hadith al-kudsî, na so Janâb-i Hakk na insarat Iyan:   اَنَا عِنْدَ ظَنِّ عَبْدِى بِى

na giyanan na, “Pagaadatan Akn so ‘abd Akn sa okit a kakikilalaa niyan Rakn.”

Kagiya maoto, na sabap ko ka daa otk iyan ago ribat i kokoman, na giya a daa ontong iyan a mama na tiyarima iyan a so miyailay niyan na kalilid ago giyoto dn i hakikat iyan, nago inikidiya, ikikidiya ago ikhidiya rkaniyan so giyanan a okit. Knaba skaniyan maooyag o di na maatay kaan masabt. Mararasay skaniyan sa lagid anan a siksa. Awaan tano giya a doan iyan go daa ontong iyan a mama sa giyaya a siksa, na phato tano kaan tano kasaboti so btad o giyoto a isa a pagari.   

 

Sii, giya a babarakatn ago makanononaw a taw na lomiyalakaw dn, ogaid na knaba skaniyan mararasay ko simokt lagid o pagari niyan kagiya skaniyan na gii mamimikiran sa manga pipiya a shay’ ago  poringana iyan na so manga pipiya a shay’ kagiya skaniyan na mapiya i okitokit. Phiparoparo niyan a ginawa niyan. Knaba skaniyan mararasay sa kargn ago bagambang lagid o pagari niyan. Kagiya katawan iyan so atoran, piyaratiyaya iyan, nago kiyapanagadan iyan so kalbod. Makadadaya skaniyan a plalakaw sangkoto a lininding ago atoran. Sii, na miyaka baak skaniyan sa sapadan. Adn a  manga pipiyaon i paras a obarobar ago onga, ago adn mambo a manga rrsikon a shay’ kagiya daa a tomatagikor ron. So pagari niyan na miyakasold sa lagid mambo oto a sapadan, ogaid na aya bo a phkailay niyan na so manga rrsik a shay’ na timbang iyan a ginawa nyanon, nago kiya sabapan sa kiyasakit iyan. Lominiyo ko sapadan sa da skaniyan maka dka. Na so giya pman a mama, na ming galbk sa maka atag ko kokoman a, “Ilay angka so manga pipiya ko langowan taman”, nago da niyan ilaya so manga rrsik a shay’. Kiya osbaan iyan so manga pipiya a shay’. Na miyaka dka skaniyan phiyapiya nago bo lominiyo.

 

Oriyan iyan, na matogotogo, na giya skaniyan mambo na somiyold ko mawlad a bagas lagid o miyaona a pagari niyan. Pankaw a miyan’g iyan so dagdb o arimaw a gomogobat. Miyalk skaniyan, ogaid na knaba lagid o kiyalk o pagari niyan, sabap ko maontol ago mapiya a pamikiran iyan, na miyatoon iyan so kasosorot sii ko kapamimikiran sa, “Giya bagas na adn a dato on, na khapakay a giya a arimaw na oripn a sosogoon a giyoto a dato.” Ogaid na miyalagoy skaniyan dn taman sa miyabaak iyan so paridi a daa ig on a (60) nm-polo mitro i kadalm nago iniitog iyan a ginawa niyan on. Lagid a gyoto a pagari niyan, na inikabd iyan so lima niyan ko kayo sii ko lmbak o paridi; na miya alangalang skaniyan sa kawang. Miya ngilaylay nago kiya nnngan iyan a dowa a pangangayamn a gii iran di pangambang’n so dowa a bkaw o gyoto a kayo. Lomiyangag na miyailay niyan so arimaw. Tomiyolong na miyailay niyan so dragon. Lagid a gyoto a pagari niyan, na miyailay niyan a btad a knaba kalilid. Miyalk skaniyan mambo ogaid na sanggibo takp i kaito o ipagabay ko kalk o pagari niyan sabap ka so kapiya niyan i okitokit na migay rkaniyan sa mapiya a pamikiran. So pman so manga pipiya a pamikiran, na inipakiilay iran rkaniyan so kapiya i paras o langowan taman. Kagiya maoto, na sabap saya, na miya pamikir iyan: Giyaya a manga btad a knba kalilid na sompa-sompat siran. Liyo san pn, na datar oba siran sosogoon. Opman, na adn a pagns sangkai a manga btad. Oway, giyaya a manga btad na gii manggolaola ka sogo o mitatapok a dato. Kagiya maoto, na knaba ako tawantawan; so mitatapok a dato na phagilayn ako niyan, phtp’ngan ako niyan, nago phagampitn ako niyan sii ko darpa a adn a antap iyan. Phoon sa giya a mapiya a kalk ago mapiya a pamikiran, miyapokaw so trang ko kapaganad: phkammsa ako, antawaa skaniyan a phtp’ng rakn ago kabaya iyan a katokawan akn skaniyan, nago skaniyan a phagampit rakn sii ko adn a pakaantapan iyan sa nggolalan ko giya a di kalalayaman a lalan? Sakamaoto, na phoon ko trang ko katokaw, na miyapokaw so kababaya ko kirk ko pagns, na phoon sa gyoto a kababaya, na miyapokaw so singanin ko kalka ko pagns, na phoon sa gyoto a singanin na miyapokaw so singayo ko kakowa ko mapiya a btad a ikhasoat ago ikhababaya o kirk ko pagns. Nampn, na inilay niyan so poro o kayo na miya ilay niyan a kayo oto a Tin, ogaid na adn a sanggibo a  manga ongaon o manga kayo sa poro iyan. Na so kalk iyan na minitaplk, kagiya siyabot iyan a so kayo oto a Tin na listaan, gonanao ago karina. So mitatapok a dato na ba anda niyan ini sompat ko kayo so manga ibarat o manga onga a pagns ago piyakammsa sii ko sapadan ago sapad iyan, nago banda niyan tiyagoan sa pandara so kayo a itndo ko manga pangn’ngkn a pithiyagar iyan ko manga bisita niyan.  O di, na so satiman a kayo na di kapakay a monga sa sanggibo a kayo. Nampn, na miphoon skaniyan mangangarapan, kagiya maoto na miyaoyat skaniyan o gonsi ko pagns. Tomiyalo skaniyan, “ Hay datu o giyaya a manga darpa! Miyaka talingoma ako sii ko hadapan ka. Mlindong ako rka. Sakn na oripn ka, ago kabaya akn a psoasoatn akn ska, nago gii akn ska di mbabanogn.” Mapasad a giya kapangangarapan, na so panglban o paridi na pankaw a miya b’ngkag, nago adn a paitaw a kiyalkaan sii ko pakammsa, lintad ago tanto a mapiya a sapadan. Kna, ka so ngari o dragon na mimbaloy a paitaw, na so arimaw ago so dragon na sosolotn iran so bontal o dowa kataw a oripn; na piyaka bolos iran skaniyan. Na balabaw a so arimaw na mimbaloy a masiyonotn a koda a para rkaniyan.

 

Kagiya maoto, Hay nafs akn a boklo! Ago Hay bolayoka akn sa pamikiran! Songka sii! Ipagabay ta so btad o giyaya a dowa kataw a magari kaan ta mailay ago kasaboti a so mapiya na maawid sa mapiya nago so marata na maawid sa marata.  

 

Ilay angka! So daa ontong iyan a gii mlaya-layag ko diwang a lalan na lalayon dn nomanayaw a maka sold ko ngari o dragon; tatabadn dn skaniyan, na so pman so mala i ontong na piyakataros ko daa datar iyan sa kapiya a sapadan a mappno a manga onga. Sakamaoto, na so poso o daa ontong iyan na miyaropt ko malipds a kawan go ko tanto a pakalk-lk, na so pman so mala i ontong na iilayn go sisimaan iyan so daa datar iyan i kapiya a manga shay’ sii ko mapiya a btad o kapananggila, apiya sii ko mamis a kalk go pinathaya a ma’rifat. Kagiya maoto, na so daa ontong iyan na mararasay ko siksa ko kalk, ko ka daa panginam ago katatawantawan, na so pman so mala i ontong na phkababaya sii ko kakhakalayama, panginam ago kadali. Sakamaoto, na so daa ontong iyan na phkailay niyan a ginawa niyan a makakalaboso go malbod gobatn o manga maila a binatang, na so pman so mala i ontong na skaniyan na sslaan a bisita a phkababayaan iyan so kapakinggiginawai ko daa datar iyan i kapiya a manga oripn o Makalimoon a Bobolosan iyan. Sakamaoto, na so daa ontong iyan na phakagaann iyan so siksa rkaniyan ko kaphkhan niyan ko manga onga a lagid oba mapiya i taam ogaid na ma’nawî a pakatowa ka kagiya giyoto a manga onga na manga ibarat bo. Iniyogan skaniyan a makataamon ka anon makapanamar ko titho na go niyan siran mambanog, ogaid na da mapatot so kasambataon a datar o pangangayamn. Na so pman so mala i ontong, na phthaaman iyan siran, nago sasabotn iyan so masosowa, sindod iyan so kaphkhan iyan nago kababaya iyan a gii niyan di kapnayaw. Sakamaoto, na giyoto a daa ontong iyan na miyaka nggalbk sa dhulm ko ginawa niyan. Kagiya a daa basîrah niyan, na pimbaloy niyan so mapiya a hakikah ago so btad a maliwanag lagid o daondaw, a masopiit go malibot’ng a wahm nago Jahannam para ko ginawa niyan. Na di skaniyan patot a ikhapdi, odi na ba adn a kabnar iyan manarotaro makapantag sa apiya antawaa. 

 

Sa ibarat, na opama a so taw na di masosoat ko babaya ko mapiya a kandori a kapakakan sii ko mapiya i paras a sapadan pd o manga ginawai niyan sii ko oras a pangolaon go piyakapagobog  iyan a ginawa niyan ko manga rrsik a pakabrg, na poringana iyan a skaniyan na phkaor ago makallkas sii ko oras a pangoran pd o manga binatang nago milalis gomoraok, na knaba skaniyan patot a ikhapdi go minggalbk sa dhulm ko ginawa niyan. Di niyan phagadatan so manga ginawai niyan ka kaiilaya niyan kiran na binatang. Kagiya maoto, na giya a daa ontong iyan na lagid mambo aya. Na so pman so mala i ontong, na phkailay niyan so hakikah. Na so pman so hakikah, na mapiya skaniyan. Pagaadatan iyan so ka daa sanisaning o kirk ko hakikah ka siyabot iyan so kapiya o hakikah. Na miya patot so Rahmah Niyan rkaniyan. Kagiya maoto, na so misosoln a sogo o Kur’an a, tokaw angka a so marata na phoon rka na so mapiya na phoon ko Allah, na miya payag. Na o ipagabay ingka so salakaw ron pn a pimbidabidaan a datar aya, na sabotn ka a so nafs al-ammarah o gyoto skaniyan a sa paganay na pithiyagar so ma’nawî Jahannam sa ginawa niyan, na so pman so isa na sabap ko mapiya i niyat, mapiya i kokoman, mapiya i parangay ago mapiya i pamikiran na bigan skaniyan sa mala a pammgayn go kapipiya ginawa, a giyoto so tomtnang a fadhilah go faydh. 

 

Hay nafs akn! Ago Hay manosiya a gii mamakin’g sa giyaya a thotolan raks o nafs akn!

 

O dingka tomoon a mbaloy ka a so daa ontong iyan a pagari go mathomo ka a mbaloya so malaon i ontong, na pamakin’g angka so Kur’an, phasiyonot ka ko manga insarat iyan, kaptingka skaniyan zabnsabnar nago nggalbk ka a makaatag ko manga sogo iyan!...

O siyabot ka so manga hakikah sa giyaya a thotolan a sii ko ropaan a kapagabay, na kapakay a ipagabay ngka siran ko hakikah o agama, doniya, manosiya go îmân. Phtharoon akn so manga importanti; na ska dn i matao ko manga mananay ron.

 

Ilay ka sii! Na makapantag ko dowa kataw a magari, so isa na rûh a mu’min go poso a sâlih; so isa pman na rûh a kâfir go poso a fâsik. Na so pman so kawanan ko dowa a lalan, na skaniyan so okitokit o Kur’an go îmân. Na so diwangon, na skaniyan so okitokit o kasongkir go kufr. Na so pman so sapadan sii ko lalan, na skaniyan so sagasagad a kaoyagoyag sii ko opakat go kathagompiya o manosiya a ron mraks so khayr go sharr, so mapiya go marata, so lompiyo go marsik a manga shay’. So taw a makanononaw na skaniyan so gii nggalbk a makaatag ko kokoman, خُذْ مَا صَفَا دَعْ مَا كَدَرْ  5

nago phlalakaw a adn a salâmât ko poso iyan. Na so pman so bagas, na skaniyan so lopa go so doniya. Na so pman so arimaw, na skaniyan so kapatay go so adiyal o kaoyagoyag o taw. Na so pman so paridi, na skaniyan so badan o taw go so oras o kaoyagoyag. Na so pman so (60) nm-polo ka mitro a kadalm, na itotoro iyan so nm-polo ragon, a skaniyan so kalilid a katas a omor o kadaklan a taw. Na so pman so kayo, na skaniyan so bagian ko katas a omor go so mbolawasan o kaoyagoyag. Na so pman so dowa a pangangayamn, isa a mapoti go isa a maitm, siran so gagawii ago daondaw. Na so pman so dragon, na skaniyan so lalan o barzakh go sormbi o âkhirah, na so ngari iyan na so kobor, ogaid na sii ko mu’min, na giyanan a ngari na paitaw a lawanga ko sapadan phoon ko malibot’ng a kalaboso. Na so pman so pakagasta a paold-old, na siran so manga morala o doniya, ogaid na sii ko mu’min, na siran so manga pipiya a in’ngka o Allah go manga pammgayan o Rahman kaan skaniyan mikiyas ko kakhaolog iyan ko torog o ghaflah. Na so pman so manga onga ko kayo, siran so manga kadoniyaan a ni’mah; so Janabi Karîm (Jalla Jalâluhu) na inadn Iyan siran sii ko ropaan o listaan, pananadm go kaibarat o manga ni’mah ko âkhirah go manga sampol a phagampitn iyan so manga gii mamamasaan ko manga onga ko Jannah. Na so pman so kayo a phmbgay sa madiyang a mbidabida i onga apiya skaniyan na isaisa a kayo, na itotoro iyan so tanda o Kudrah o As-Samad, so nanao o rubûbiyyah o Allah nago so toos o kadato o ulûhiyyah Niyan, sabap ko arts datar o “kabaloya ko langowan taman phoon ko isa a shay’,” na giyanan skaniyan, na kabaloya ko langonlangon a pamomolaan go onga phoon sa satiman a shay’, a so lopa, sakamaoto na so kaadna ko langonlangon a pangangayamn phoon sa satiman a shay’, a so ig, nago so kaadna ko langonlangon a barokan, ai ago anggaota o manga pangangayamn phoon ko pangn’ngkn a simpli, na datar mambo o “kabaloya ko isa a shay’ phoon ko langowan taman,” na giyanan skaniyan, na phoon ko pithibarangan a pangn’ngkn a phkn o manga kaadn a oyagoyag, na phagaol sa kobal a simpli go gii mbaal sa sapo a mattndo ko giyanan a kaadn a oyagoyag, na siran na toos a di kakopiya, nanao a rk iyan bo go tanda a ispisiyal o Sultân a Azalî go Abadi (tatap a daa kaposan Iyan), a skaniyan na Al-Ahad, As-Samad. Oway, so kabaloya ko langowan taman phoon ko isa a shay’ go so isa a shay’ phoon ko langowan taman na ayah ago toos a ispisiyal ko Al-Khâlik o langowan taman nago Al-Kadîr ko langowan taman.

 

Na makapantag ko pagns, na skaniyan so misosoln a hikmah o kaadn a kapakay a kalkaan sa nggolalan ko misosoln a îmân. Na so gonsi, na skaniyan so يَا اَللّٰهُ *لاَ اِلهَ اِلاَّ اللّٰهُ * اَللّٰهُ لاَ اِلهَ اِلاَّ هُوَ الْحَىُّ الْقَيُّومُ6

Na so pman so kiyabaloy o ngari o dragon a paitaw ko sapadan, na itotoro iyan a sii ko manga taw a somosongkir go gii inggalbk sa dhalalah, na so kobor na simokt lagid o malibot’ng a kalaboso sii ko pagltan o kalk ago kadadas nago skaniyan na paitaw a lawanga ko kobor a datar o kaninit o tiyan o dragon, na sii pman ko pagtaw o Kur’an ago îmân, na so kobor na paitaw a lawanga ko manga sapadan a tatap a daa kaposan phoon ko malibot’ng a kalaboso o doniya, ko manga kalamalama o Jannah phoon sa darpa a pag-iksaminan nago ko limo o Rahman phoon ko manga karomasayan o kaoyagoyag. Na so pman so kiyabaloy o maila a arimaw a malangas a oripn go kiyabaloy niyan a masiyonotn a koda, na itotoro iyan a sii ko manga taw a gii inggalbk sa dhalâlah, na so kapatay na malipds a kasalingganata ko langowan a phkababayaan iran. Nago so kapatay na so kinitaogn phoon ko ribat a doniya iran a Jannah, ka makakalaboso go makasosold siran ko malibot’ng a kalaboso o kobor sii ko pagltan o kalk ago katatawantawan, ogaid na sii ko pagtaw o hidâyah go Kur'an, na so kapatay na skaniyan so okit a kiyatimoa pharoman o manga miyaona a bolayoka ago phkababayaan iran, a somiyong sa salakaw a ‘âlam. Nago so kapatay na okit a kapakasold ko titho iran a ing’d ago darpa a kapipiya ginawa dayon sa dayon. Nago skaniyan na ampitampit ko kalamalama o Jannah phoon ko malibot’ng a kalaboso o doniya. Nago skaniyan so oras a ka tharimaa ko sokay phoon ko fadl o Rahmân, a Skaniyan na Rahîm, balas o sirbisiyo niyan. Nago so kapokas ko karomasayan ko atastanggongan o kaoyagoyag. Nago skaniyan pn so kithargn ko kapaganad, ko sogoan ko ‘ubûdiyyah nago ko kapag-iksamin.

 

Sii ko makampt a katharo: Sa taw a baloyn iyan so kaoyagoyag a sagasagad a onayan a singanin niyan na sisii sa ma’nawî Jahannam, apiya pn datar o sisii skaniyan sa Jannah. Nago sa taw a tanto a totordon iyan so  kaoyagoyag a tatap a daa kaposan iyan na bigan sa kapipiya ginawa ko dowa a doniya. Na apiya pn marata go marikor so doniya iyan, na kagiya kaiilaya niyan ko doniya iyan na lagid o kowarto a gii pnayawan ko Jannah, na kaiilaya niyanon na mapiya, na phtigrn iyan nago gii sabar go gii manginsokor.

 

اَللّٰهُمَّ اجْعَلْنَا مِنْ اَهْلِ السَّعَادَةِ وَ السَّلاَمَةِ وَ الْقُرْآنِ وَ اْلاِيمَانِ آمِينْ

اَللّٰهُمَّ صَلِّ وَ سَلِّمْ عَلَى سَيِّدِنَا مُحَمَّدٍ وَ عَلَى آلِهِ وَ صَحْبِهِ بِعَدَدِ جَمِيعِ الْحُرُوفَاتِ الْمُتَشَكِّلَةِ فِى جَمِيعِ الْكَلِمَاتِ الْمُتَمَثِّلَةِ بِاِذْنِ الرَّحْمنِ فِى مَرَايَا تَمَوُّجَاتِ الْهَوَاءِ عِنْدَ قِرَائَةِ كُلِّ كَلِمَةٍ مِنَ الْقُرْآنِ مِنْ كُلِّ قَارِءٍ مِنْ اَوَّلِ النُّزُولِ اِلَى آخِرِ الزَّمَانِ وَ ارْحَمْنَا وَ وَالِدَيْنَا وَارْحَمِ الْمُؤْمِنِينَ وَالْمُؤْمِنَاتِ بِعَدَدِهَا بِرَحْمَتِكَ يَا اَرْحَمَ الرَّاحِمِينَ آمِينَ وَالْحَمْدُ لِلّٰهِ رَبِّ الْعَالَمِينَ