AWÂM - عوام

 

So sabaad ko jama’ah a daa madalm a katao (ilmo) niyan. So skaniyan a da makasowa, di matao matiya go sorat. Sii ko tasawwuf, na so skaniyan a da mirampay ko tarotop a hakikah  ago da maka anad sa madalm a manga hakikah o Tawhîd.

Adn a bidaan o ‘awâm gowani ko omat a Islamik ago so ‘awâm imanto a omat a mapi-fitnah. Kagiya so gowani ko omat a Islamik, na kadaklan ko manga bitiyara na makapantag sa agama ago âkhirah, na so kasasaboti ko kapiyaan ago karataan na makaatag ko manga kokoman o Sharî’ah ago omat, na gii mipamangdao so manga pipiya a parangay lagid o mlng ko atastanggongan ago moat go karg ko agama. Sa ibarat, mipantag sa darpa o agama Islam a giyanan so omat a Islamik. “Sii ko darpa o agama Islam, na so mlilibtaon na phmbgay sa insarat ko makampt a manga ma’ana o gyoto a babarakatn a manga kalima ko manga pagtaw o Islam golalan ko “basa iran a kaadn”.  So manga bitiyara o manga pagtaw ko Islam na makapantag sa manga smpad o Islam ago totholan ko gowani mipantag ko Islam, na go so langon a manga shaâ’er o Islam ago so langon a polaos iyan, lalayon a gii mipamangdao sii ko manga pagtaw o îmân so makampt a ma’ana angkoto a manga kalima a babarakatn. Sa ingd aya, na salakaw pn ko manga darpa o ‘ibâdah ago manga madrasa, na apiya so manga koba sii ko manga plbngan na lagid a manga goro a gii niyan mipamangdao so giyangkoto a manga ma’ana a babarakatn sii ko manga pagtaw o îmân ago gii niyan panonoosan siran kiran.” So Manga Sorat (507)

 

Ka an mi abay so omat a Islamik ko omat a mapi-fitnah:

Badn datar o pitibarangan a dagangan a aya gii plobaan sa padian a makaatag ko mosim. Igira kowan, na so pitibarangan a dagangan na aya ipapanton. Kagiya maoto na sii sangkoto a kambayambayan o ‘âlam go so padian o opakat a kaoyagoyag o manosiya ago so kathagompiya o manosiya,na omani masa, na pitibarangan a dagangan i aya gii plobaan go ipapanton; na skaniyan i kakayarn sa padian sa masa oto; na phkabaraya iyan so manga panton, so pangilaylayan na sii rkaniyan, so manga otk na ron pkhagoyod.

Sa ibarat, saimanto a kapapantagan, na so lankap a gii mbabanogn ko dagangan na so politika, so kakowaa ko donya ago philosophy. Na go sa masa o Salaf as-Sâlihîn ago sa padian ko giyoto a oras, na so daa lawan a gii plobaan a dagangan na so kakhasaboti ko Kalima o Khâlik o samâwât ago lopa, so rayo Iyan phoon ko manosiya ago manga shay’ a aya Niyan i phkasoat, ago golalan ko nûr o nubuwwah ago ko Kur'an, na so kasosokat ko okit a kakowaa ko dayon sa dayon a kapipiya ginawa sii sa ‘âlam o âkhirah, a kiyalkaan a timbang a di khalkban...

...Sa giya oras, sabap ko kandaraag o kaoosor a Europe ago so kaoona o natural philosophy ago so btad o kaoyagoyag sa doniya a mbabaloy a mapnd, na so otk go poso na mimbaloy a mipaparak, nago so panamar go bd-bd na mababagi. So pamikiran o otk na mimbaloy a di kalayaman sii ko manga nganin a ma’nawî.

So Ikadowa polo ago pito a Kalima- So Ika Tlo