KUDRAH - قُدْرَة

Marayag a ma’ana:  Bagr.  Kabsaran. Polos. Titayan. Daa tamana iyan a bagr. So bagr o Allah a makakakp iyan so langon.

Sii ko ‘Ilm al-Kalâm: So malai kipantag, mona a tatap a daa kaposan iyan ago oriyan a tatap a daa kaposan iyan a manga Sifat o Allah (‘Azza wa jalla) a makada-daraag ko langon a maklok.

“So Kudrah, ‘Ilm, ago Irâdah (jalla jalâluhu) Niyan na siran na lagid a sindaw o alongan, وَ لِلّٰهِ الْمَثَلُ اْلاَعْلٰى na magagaks iran so langowan taman ago makakakp so langon a nganin. Di siran kapakay a tagoan sa tamana odi na ipagabay ko apiya antonaa.  Na datar ba dn o phagilayin iran so daa lawan iyan a mawlad a manga shay’, lagid o ‘arsh, na kagiya maoto na siran na phagilay so daa lawan iyan a maito, lagid o indang. Ago datar ba dn o kiyaadn iran ko alongan ago olan, na kagiya maoto na inadn iran so manga mata o paoldold ago tamotamok. Ago datar ba dn o kinibtadn niran ko maporo a atoran o maklok, na kagiya maoto na inibtad iran mambo so manaot a atoran sii ko manga tiyan o miyamakaronironi a manga kaadn. Ago datar ba dn o kiyathks iran ko manga bitoon ago manga kaadn sa liyo a doniya, a maa alangalang sa kawang golalan ko kokoman Iyan a kaingaranan sa gravity, na kagiya maoto na phthanorn iran so manga miyamakaronironi a poling golalan ko isan oto a kokoman, a mababaloy a daa lawan iyan a mainot a ibarat iran. Na sisii ko kirarampat o ka daa  mnang  angkoto a barambarang a daradat a phkhaolaola sii ko kudrah. Na kagiya maoto,  na so langon a shay’ na mrp-rpng  sii ko hadapan o Kudrah o  Skaniyan oto a Isaisa a so ka daa mnang na da mapakay Rkaniyan. Ka so ka daa mnang na soranga o Kudrah.” Manga Toos o Pakammsa ( 83 )