SO IKADOWA A KALIMA

 

بِسْمِ اللّٰهِ الرَّحْمٰنِ الرَّحِيمِ

 

اَلَّذِينَ يُؤْمِنُونَ بِالْغَيْب1

 

O khabayaan ka a kasabotingka ko andamanaya i kala o kapipiya ginawa ago ni’mah, ago andamanaya i kala o kababaya ago kalbod a khatoon sii ko iman, na ilay go pamakin’g angka giyaya a mababa a thotolan a sii ko ropaan a kapagabay:

Miyakaisa, na so dowa kataw a mama na lomiyalakaw kaan matmbang ago mkandagang. So isa na tormisan ago daa ontong iyan, na somiyold sa isa a phagagawan; so salakaw ron na mala i ontong, katawan iyan so Allah ago phkailay niyan so hakk ago so hakikah, na somiyold sa salakaw a phagagawan, go rominirok siran dn.

Sabap ko so tormisan a mama na dalo ago marata i kapamimikiran ago pipikirn iyan bo na ginawa niyan na aya dan’g sii ko kapapamikiran iyan sa marata, na sa ilayan iyan na miyaolog skanyan sa tanto ko marata i btad a ingd. Phkailay niyan na: sa langkap na so manga daa ontong iyan a di phakagaga na badn phakasangongo sa “Aidow! Ainaw-ainaw! sabap ko pakalk-lk a manga aragasi ago so kaphakabinasa iran. Phkailay niyan so btad a rimokt ago malipds ko langon a darpa a phkasongowan iyan. So langon ko ingd na mimbaloy a walay a kamboko. Kaan di kagdami so malipds ago malibotng a masosowa, na da dn a ba niyan matoon a okit inonta ka magobog badn. Sabap ko langolangon na lagid o ridoay go mananangga rkaniyan. Ago so langon a maalibt na kaiilaya niyan non na piyakalk-lk a manga mayt ago manga ilo a gomogoraok ka da a panginam iran. So konsinsiya niyan na lalayon dn masisiksa.

So salakaw a mama, a skaniyan na makknal iyan so Allah ago phkailay niyan so hakk ago hakikah, ago gii nggalbk sa manga ibadah ko Allah, nago aya niyan sangan na so hakk, na kagiya adn a mapiya niyan a parangay na sii ko ilayan niyan on na miyatago skaniyan ko tanto a mapiya a ingd. Na kagiya maoto, na giya a mapiya a mama na phkailay niyan a palaya pkaradiyaan sii sa ingd a kiyasoldan iyan. So langon a lomilibt na kasosonor, kalilang, so manga darpa a ron so tanto a kababaya ago karadiya sii ko dhikr ko Allah. Omani isa na lagid o ginawai go lolot iyan. Sii ko koliling o ingd na phkailay niyan so hari raya a mappno a kasonor ago katapi ko maradika. Phkan’g iyan pn so masosonor a dagdb o tambor ago bayok sabap ko kapangpd sii ko mga sondaro rakhs a phtakbir sa “Allahu Akbar” go phtahlil sa “La ilaha illallah” siran. Sambi o paganay a daa ontong iyan a mama a makamboboko dn sii ko kalipds o ginawa niyan go so langon a taw, na giya a mala i ontong a mama a masosoat ago mabababaya sii ko kasosonor iyan ago so langon a taw. Bolabaw san, na skaniyan na miyakalaba sii ko dagangan. Gii skaniyan makapanginsokor sii ko Allah.

Oriyan niyan na skaniyan na miphato na miyabalak iyan angkoto a salakaw a mama. Siyabot iyan so btad iyan na pitharoan niyan skaniyan sa: “Mimbaloy ka a daa plng iyan. So karataan a sisii rka na masikn a aya rka lominiyo na kagiya maoto na arangan kaon na so kakayad na kagoraok, go so maradika na kapamankhaw go kapanganiyaya. Kno-kno ka go soti angka so poso oka. Kaan giya a rnding a balaola na an mapokas ko pangilay-layan ka nago an ka mailay so hakikah. Kagiya so ingd o daa unaan go tamana iyan a maontol, makalimoon, mabagr go mala i siyap ago maginawa a sultan, a skaniyan pn na mala i tagikor ko manga pagtaw niyan, go maiipat iyan so katatanor, na ingd a so manga galbk a kathagompiya go adn a rarad iyan na phkailay ron o manga mata, na di kapakay a mambontal angkoto a inipaki ilay rka o wahm ka”.  

Nampn na giyoto a daa ontong iyan a mama na miyakatanod, mitawbat nago miyatharo iyan: “Oway, mimbaloy ako a bthang sabap ko kapagobog. Pangninta ko Allah a masoat Skaniyan rka ka inogopan akong ka ko btad a lagid dn o Naraka Jahannam.”

Hay nafs akn! Tokaw angka na giyoto a paganay a mama na kafir. Odi na skaniyan na ghafil a fasik. Sa pangilaylayan iyan, na giya a donya na walay a palaya kamboko. Langon a manga kaadn a oyagoyag na manga ilo a gomogoraok dn ko oman i kapakasalingganata go kapatay. Sii pman ko manga pangangayamn go manosiya, na siran na magigisaraw a piyaka-kapkapdi ka maoomparik sabap ko karos o adiyal. So manga ala a kaadn lagid o manga palaw go manga ragat na piyamakalklk a mayt a da ba iran ruh. Madiyang a masakit, phamakalanggowap go piyamakalklk a manga wahm lagid ini na makapopoon ko kufr go dhalalah niyan nago kasasabapan o kasisiksa iyan a maka ookit sa ma’nawi.

Na so pman so salakaw a mama, na skaniyan na mu’min. Skaniyan na kikilalaan go tatarimaan iyan so Janab Al-Khalik. Sa pangilaylayan iyan, na giya a donya na darpa ini a dhikr ko Rahman, darpa a gii paganadan o manosiya ago pangangayamn, nago darpa a tpng ko manosiya go jinn. Sii pman ko langowan a kapatay o manga pangangayamn go manosiya, na siran na miyamaradika. So siran a miyamakapasad ko atastanggongan iran sii ko kaoyagoyag na salingganat siran sa kababaya phoon sa giya a sagasagadan a darpa antap ko donya a knaba ndibarati kaan kalkai so manga darpa ko manga bago a opisiyal kaan siran makatalingoma go makanggalbk. So pman so langowan a inimbawata a manga pangangayamn go manosiya, na giyoto dn i kiyapamangpd iran sa armi, kiyatalowi kiran sa kapt sa sinapang ago kapagpoon o atastanggongan iran. Omani isa ko langowan a manga kaadn a oyagoyag na masosonor a tomotordo a sondaro, go mustakim, ago masosoat a opisyal. Mipantag pman ko langowan a manga sowara, na siran na dhikr ago tasbih ko gii kapagphooni ko atastanggongan, so shukr ago kapiya ginawa ko oriyan o galbk iran, odi na so manga bayok a makapopoon ko kasosonor ko kanggalbk. Sa pangilaylayan angkoto a mu’min, na langowan a kaadn na malangas a oripn, masakaw a opisyal, go matanos a kitab o Sayyid a skaniyan na Karim ago Malik, a skaniyan na Rahim. Tanto a madakl a mitatakar a mananaw, maporo, malmbo go mamis a manga hakikah a datar ini na phkailay ago phnggmaw phoon ko iman niyan.

Aya ma’ana niyan na so iman na babakontoln niyan so liso o ma’nawi a kayo sa Jannah a Tuba, na so pman so kufr na lilibonn iyan so liso o ma’nawi a kayo sa Naraka Jahannam a Zakkum.

Aya ma’ana niyan na so salamat (linding) go kapagipat na sii bo anan ko Islam ago iman. Sabap san na aya tano patot lalayon gii tharoon na اَلْحَمْدُ لِلّٰهِ عَلَى دِينِ اْلاِسْلاَمِ وَ كَمَالِ اْلاِيمَانِ2